عزيزي القارئ اسمح لي أن أقطع تثاؤبك الصباحي كده من غير إحم ولا دستور و أقولك من غير مناسبة كده صباح الفل يا عم الكل .

إسلام فتحي - ساخر

  

 

ان كنت وصلت إلي هنا بالسلامة بعد اكتشافك انك كنت تعرف كل العناوين التي قرأتها في الصباح مسبقا وأن كل شيء كالمعتاد الأهلي بياخد الدوري والوطني بيكسب علطول ومراتك منكده عليك عيشتك كالعادة ووقع بصرك علي عنوان مقالي وظننت انني بعدها سأقوم بزغزغتك علي الصبح عبر السطور القادمة فاسمح لي اقول لك -علي عيني يا حبة عيني - منين ؟ ما الحال من بعضه وحياتك انت ما فيه - بح- خلاص، وان كنت تعتقد انني سأنتقد في مقالاتي الحكومة بما سيشفي غليلك وغيظك منها أحيانا لا سمح الله فأنا لا هغشك ولا هخمك يرضيك يعني أفتري علي الناس؟ ده حتي ربنا ما يرضاش بالظلم..!

 

حتي لو وجدت مقال ولا خمسة ينتقدون شيء ما في السياسة فهذا ليس معناه إن لا سمح الله فيه حاجه وحشة مش عجباني –ابسولوتلي - وليس معناه إني فاضي بقي للزغزغة " وكركر كركر" المهم ..خليها حلقة في ودنك يا بخت من بكاني وبكي معايا ولا ضحكني وضحك ويايا ..فهيا بنا نبكي علي أخلاقيات ضائعة ..نبكي من فرط الضحك.

 

- 1-

 

 بوكسر –ريد- بكرانيش

 

في عبارة روتينية لمشاهدة فتارين المحلات ومعروضاتها قالت لي خطيبتي

 

- شوف... اللون الأحمر طالع لنا ..!

 

- فسألتها ببراءة الجاهل يعني إيه طالع ؟

 

- فقالت لي مغتاظة: يعني الموضة السنة دي للبنات الأحمر

 

وقبل أن تكمل صرخت فرحة ..شوف .. ده طالع لكم انتم كمان لا أعلم سر سعادتها الغامرة بإن اللون الأحمر طالع لنا وكأنه وحمة .

 

طالع = موضة ،هذه أولي المعلومات التي أستقيها من سموها حفظها الله بعد الخطوبة ،وللزواج فوائدٌ أخري يا عزيزي..أهمها أنه كالصيد يعلمك الصبر وطولة البال ويعلمك كلمة "حاضر يا حبيبتي" حتي ولو لم تفعل ..صدقني لها مفعول السحر.

 

المهم خلينا في اللون الأحمر اللي طالع لنا .

 

الألوان والموضة لم تقتصر فقط علي القمصان والبناطيل والبلوزات ،كنت مثلكم جاهل أظن ذلك حتي الصباح الذي أصرت فيه خطيبتي أطال الله في عمرها وقصر في عمر إصرارها للذهاب معها للجامعة بغرض تصوير بعض الأوراق..

 

الجامعة ..ياله من مكان رائع ..محراب العلم ..ومهد العلماء.. ومنبر الخطباء

 

ولكنه أيضا مكان لكل أنواع الكرانيش اللي في الدنيا..نعم عزيزي..

 

الجامعة بيئة خصبة جدا تعرف منها كل أنواع الموضة وخصوصا في البوكسرات والكرانيش  ..

 

أحمر ..أزرق ..أصفر كناري ..أخضر...بفته ودمور ..بكرانيش ومن غير.. وعلي كل لون يا باطيستا.. موضة وتقليد تعدي الحدود ..فياساعدك يا هناك تبقي أمك داعية لك لو الأنسة بكيزة حبت تعمل كده ولا تيجي كده يستطيع كل أخصائي في الموضة أن يفهم قصدي ،أو شغال في المساحة تقدر وقتها تمسح المنطقة جيولوجيا لتحديد كل المرتفعات والمنخفضات.

 

أنا لا أنصح الشباب لا سمح الله بتحين الفرص للمسح الجيولوجي ..أنصح مين ؟ بلا خيبة ..دا الشباب عايزين اللي يمسح لهم ..جيولوجيا يعني .. هما كمان بيحبوا يعملو كده ..وكده..!

 

تلاقي الخنفس معتز ببوكسره قوي ..

 

صباح الخير يا توتو ..لون بوكسرك يجنن

 

الله يخليك ياحياتى ...اتفضله..انت كمان بوكسرك لونه يهبل ..اللون الفوشيا عليك يجنن

 

جبته منين ..دا انا دايخ عليه ..!!

 

أثناء شرودي في الوقعه المهببة اللي شايفها قدامي مر من أمامي شاب..مش شاب عادي كده زينا ..دا بسم الله ما شاء الله  فحل.. ويرتدي بوكسر بمبي ..!

 

ويـُهيئ لي والله أعلم إنه لا سمح الله كان مسخسخ.. البوكسر اللي مسخسخ مش الواد.. ها ؟ عارف نواياكم

 

وقتها حسيت اني جاهل ومش مساير الموضة خالص..فذهبت الي محل البوكسرات وعزمت شراء واحد اعلقه في غرفتي بدل لوحة الولد العبيط اللي بيضحك ..اشمعني انا يعني..

 

تلقفني البائع من لحظة دخولي المحل

 

..صباح الفل يا باشا ..

 

بتدور علي لون معين  حضرتك ؟

 

فرفعت حاجبي محتار بعيد عنكم

 

فأمسك بلون أخضر مشجر كان أمامه..

 

طب تصدق بايه البوكسر ده كان رايح المانيا وأمريكا ..تصدير بقي عقبال أملتك ..!

 

ومتكلمين عليه في لندن والموسكي والعتبة..

 

وطالبينه بالإسم في لبنان وتونس الخضرا عشان أخضر يعنى ..

 

بس تقول ايه ..

 

ايييييييييه النصيب بقي..عشان حمادة يلعب..!

 

فسالته في زعر:  حمادة مين حضرتك ..؟

 

فمال عليا وقال لي وهو يغمز:  مش البيه حماده بردو ؟

 

فقلت له : متشتمش لو سمحت أنا مش خنفس  ..

 

أنا عايز بوكسر أحمرعشان يمشي مع لون الحيطة .. متفهمنيش غلط

 

فابتسم وقالي .. بوكسر ريد بكرانيش يعنى؟  ..طلبك عندي ..ولا يكون عندك فكر..

 

أما خطيبتي..فحرمت تاخدني معاها تاني في أي حتة .. والله يرحم الرجولة ..

وعجبي..

 

 

اسلام فتحي

..

أضف إلى: