فكرة .. مدري وش اللي جابها على بالي .. وأتوقع أن الفراغ و " البطالة " هي السبب اللي يخليني أجيب أفكار ( ميب لم سنع ) ، الحين وش السبب اللي يخلينا نشرب و ( نقحن ) المشروب الرمضاني ( فيمتو ) ، وليش ما نشربه في وقت غير رمضان وش العلاقة بين الإثنين؟؟.

وش رأيكم تبحرون معي على مركب ( التسطيل ) ونحلل المقصد والمغزي والهدف من شرب ( الفيمتو ) في شهر رمضان المبارك .

الحين مناسبات الغرب مثل الزواج وش اللي مرتبط معها ؟ أليس الشمبانيا اللي طعمه مثل طعم الجوز الهندي ولكنه فيه شوية مرارة ( طبعاً كما يقال أنا ما أعرفه والله يزيدني به جهل ) وربما تستخدم الشمبانيا في أعياد الميلاد إذا كان الشخص بالغاً خاصة وأن الشمبانيا لا تسبب السكر الكامل لشاربها بعكس المشروبات الأخرى (هم يقولون) .

 طيب .. مناسبات ثانية وهي رأس السنة أو الكريسميس والتي يشرب فيها النبيذ الذي يشبه طعمه طعم العنب البايت (هم يقولون) ، ويأكلون فيه ( الديك الرومي ) اللي حنا نشرب الشوربة بداله في رمضان.

ألا تتفقون معي أننا ( مسرج ) بنا ، وأن الفيمتو قد أصبح مع مرور الوقت و بشكل غير مباشر تشبهاً بالكفار ومناسباتهم ؟؟.

ألا يجب على مشائخنا الأفاضل ( المقصود هنا مشائخنا أصحاب الشطحات فقط) أن يعيدوا النظر في كثير من الأمور الهامة والتي تستوجب التحريم كونها تعد تشبهاً بمن هم ليسوا على ديننا.

وإذا هذا السبب ليس بمقنعاً لهم ، فأنا أعطيهم سبباً أخر ، وهو أن ( الفيمتو ) أصبح أداة من تجارنا الأفاضل للعب على الدقون والترويج له بأسعار رخيصة جداً علشان يجذبونهم ويزيدون عليهم أسعار السلع الأخرى اللي غصب عليهم يشترونها.

وبعض الناس يا حافظ مشافيح ومدمني فيمتو إذا جاء رمضان ( لأن بعضهم يعتبرون أن صيامهم لن يكمل بدونه) مثل بعض أهل القصيم إذا أخذوا عمره لازم يمرون على مطعم البيك وإلا يعتبرون عمرتهم غير كاملة.

فإذن يجب على مشائخنا ( أصحاب الشطحات) تحريم هذا المشروب فربما تظهر صورتهم مرة أخرى في وسائل الإعلام، فعشمنا فيهم كبير ، بعد أن فقدنا الثقة بوزارة التجارة وحمايتنا .

مخبط بأخر اللفه

..